W ti zalë pòkazëjemë pòdstawòwé nôrzãdza zrzeszoné z òbróbką zemi. Tej są to redła ò ramòwi kònstrukcji, płëdżi z dwiema sochama, walc piestrzeniowi, bróna złożonô z drzewianëch balków, kùltiwatorë, z jaczich jeden z prezentowónëch na wëstawie zrobiony je z òdzartégò z kórë kòrzenia, a pòtemù òpatrzony trzema żelôznyma gòzdzama.
Do mechaniczny òbróbczi zemi, jakô òdbiwała sã na Kaszëbach, ùżiwónëch bëło wiele pòmòcniczëch nôrzãdzów. Na wëstawie pòkazëjemë dwie drôbczi (jerzmò - ùprziż dëbëltnô do zôprzãgów z krów i wòłów) i klëczi (jerzmò - ùprziż do pòjedinczich zôprzãgów). Òsoblëwòscą je równak to, że na Kaszëbach dosc pózno ùżiwóné bëłë kònné zôprzãdżi. Przëczëną tegò bëła m. jin. prôwda, że kònie nie sprôwdzałë sã w tutészich warënkach. Kònie nôleżą do cãżczich zwierzãtów, a terenë Kaszëb, to torfòwiska, mitczé, mòkrawé zemie. Tej zastosowanié kònia w pòlowëch robòtach sprôwiało, że òn zapôdôł sã w mitczim gruńce. Tim trudnoscóm na skùteczny i nôpierszi ôrt zapòbiégałë tzw. „kóńsczé bótë” zakłôdóné przed zaczãcym pòlowëch robòtów na kòpëta zwierzëca. Na wëstawie pòkazëjemë taczé ùnikalné egzemplarze.
Òsoblëwie wëstawioné są atribùtë przestrojińców z czasu Gòdów i Sylwestra tzw. gwiôzdków i gwiżdżów. Są tu taczé òbiektë jak: kòżëch i kòróna gwiôzdora zrobioné ze słomë, maszkarë kònia, bòcóna, kòzë i kòzła, larwë diôbła, dżada, kòminiarza i żôłnérza zrobioné z kòżëchów i grëbégò papioru.
Òbrząd gwiôzdczi i gwiżdżów na Kaszëbach pòlégô na tim, że przestrojińcë przëchòdzą do chëczi we wsë i z taczima rekwizytama twòrzą apartné widzawiszcze. Dzysô zwëk ten znóny je przédno na wsach, co je zanôleżné m. jin. òd przërzeszeniégò do tradicji.